ନୂଆଦିଲ୍ଲୀ: ଭାରତର ଯୁବପିଢ଼ିମାନଙ୍କ ମଧ୍ୟରେ ବେକାରୀ ସମସ୍ୟା ଏକ ପ୍ରମୁଖ ସମସ୍ୟା ଭାବେ ଉଭା ହୋଇଛି | ଦେଶରେ ଗତ ଆର୍ଥିକ ବର୍ଷରେ, ହଜାର ହଜାର ଲୋକ ଦେଶରେ ଛଟେଇର ଶିକାର ହୋଇଥିଲେ ଏବଂ ଆଶ୍ଚର୍ଯ୍ୟର କଥା ହେଉଛି, ଛଟେଇ କରିଥିବା କମ୍ପାନୀମାନଙ୍କ ମଧ୍ୟରେ ରିଲାଏନ୍ସ ଠାରୁ ଟାଟା ପର୍ଯ୍ୟନ୍ତ ଅନେକ କମ୍ପାନୀଙ୍କ ନାମ ରହିଛି। ଏକ ରିପୋର୍ଟରେ ଦର୍ଶାଯାଇଛି ଯେ ଗତ ଆର୍ଥିକ ବର୍ଷରେ ୫୨୦୦୦ ଲୋକଙ୍କର କେବଳ ରିଟେଲ କ୍ଷେତ୍ରରେ ଚାକିରି ହରାଇଛନ୍ତି। ଛଟେଇ କରୁଥିବା କମ୍ପାନୀଗୁଡିକରେ ରିଲାଏନ୍ସ ଇଣ୍ଡଷ୍ଟ୍ରିଜର ରିଲାଏନ୍ସ ରିଟେଲ, ଟାଟା ଗ୍ରୁପର ଟାଇଟାନ, ରେମଣ୍ଡ, ପେଜ ଇଣ୍ଡଷ୍ଟ୍ରିଜ, ସ୍ପେନ୍ସର ଇତ୍ୟାଦି ପ୍ରସିଦ୍ଧ କମ୍ପାନୀ ରହିଛନ୍ତି । ଏହି ଖୁଚୁରା କମ୍ପାନୀଗୁଡିକର ବାର୍ଷିକ ରିପୋର୍ଟ ଦର୍ଶାଏ ଯେ ଗତ ଆର୍ଥିକ ବର୍ଷରେ ସେମାନେ ନିଜ କର୍ମକ୍ଷେତ୍ରରେ ପ୍ରାୟ ୫୨ ହଜାର କର୍ମଚାରୀ ହ୍ରାସ କରିଥିଲେ। କର୍ମଚାରୀଙ୍କ ଛଟେଇ ଦୃଷ୍ଟିରୁ ଘରୋଇ ରିଟେଲ ବଜାରରେ ରିଲାଏନ୍ସ ରିଟେଲ ହେଉଛି ସବୁଠାରୁ ବଡ କମ୍ପାନୀ ଯିଏ କି ସର୍ବାଧିକ ଲୋକଙ୍କୁ ଛଟେଇ କରିଛି ।
ସେହିଭଳି, ଗତ ଆର୍ଥିକ ବର୍ଷରେ ଟାଇଟାନର କର୍ମଚାରୀଙ୍କ ସଂଖ୍ୟା ୮୫୬୯ ହ୍ରାସ ପାଇ ଏହି ସଂଖ୍ୟା ୧୭୫୩୫ରେ ପହଞ୍ଚିଛି। ମାର୍ଚ୍ଚ ୩୧, ୨୦୨୪ରେ ଶେଷ ହୋଇଥିବା ଆର୍ଥିକ ବର୍ଷରେ ପେଜ୍ ଇଣ୍ଡଷ୍ଟ୍ରିଜ୍ ରେ କାର୍ଯ୍ୟ କରୁଥିବା ଲୋକଙ୍କ ସଂଖ୍ୟା ୨୨୫୬୪ରେ ପହଞ୍ଚିଛି, ଯାହା ପୂର୍ବ ବର୍ଷ ତୁଳନାରେ ୪୨୧୭ କମ୍ । ରିଲାଏନ୍ସ ରିଟେଲ, ଟାଇଟାନ, ପେଜ, ରେମଣ୍ଡ ଏବଂ ସ୍ପେନ୍ସର କର୍ମଚାରୀଙ୍କ ଛଟେଇ ସଂଖ୍ୟା ୫୨ ହଜାରରେ ପହଞ୍ଚିଛି। ତେବେ ଅନ୍ୟପକ୍ଷରେ ଖୁଚୁରା କ୍ଷେତ୍ରର ଅନେକ କମ୍ପାନୀରେ କର୍ମଚାରୀଙ୍କ ସଂଖ୍ୟାରେ ବୃଦ୍ଧି ଘଟିଛି। ୨୦୨୨-୨୩ ଆର୍ଥିକ ବର୍ଷରେ ଟାଟା ଗ୍ରୁପ୍ ର ଟ୍ରେଣ୍ଟରେ କର୍ମଚାରୀଙ୍କ ସଂଖ୍ୟା ୧୯୭୧୬ ଥିଲା, ଯାହା ୨୦୨୩-୨୪ ଆର୍ଥିକ ବର୍ଷରେ ୨୯୨୭୫ କୁ ବୃଦ୍ଧି ପାଇଥିଲା | ସେହିଭଳି, ଡି ମାର୍ଟର କର୍ମଚାରୀଙ୍କ ସଂଖ୍ୟା ୬୦୯୦୧ରୁ ୭୩୯୩୨ କୁ ବୃଦ୍ଧି ପାଇଛି | ଭି ମାର୍ଟର କର୍ମଚାରୀଙ୍କ ସଂଖ୍ୟା ୯୩୩୩ ରୁ ୧୦୯୩୫କୁ ବୃଦ୍ଧି ପାଇଥିଲା |
